தூத்துக்குடி மாநகராட்சியின் மாதாந்திர சாதாரணக் கூட்டம் மேயர் ஜெகன் பெரியசாமி தலைமையில், ஆணையர் பிரியங்கா மற்றும் துணை மேயர் ஜெனிட்டா முன்னிலையில் நடைபெற்றது. இக்கூட்டத்தில் மாநகரின் வளர்ச்சி மற்றும் பொதுமக்களின் பாதுகாப்பு கருதி பல்வேறு முக்கிய முடிவுகள் எடுக்கப்பட்டன.
மாடுகளுக்குத் தடை மற்றும் டிஜிட்டல் போர்டு கட்டுப்பாடு: மாநகரில் சாலைகளில் சுற்றித் திரியும் மாடுகளால் விபத்துகளும் உயிரிழப்புகளும் ஏற்படுவதைச் சுட்டிக்காட்டிய மேயர், ஜனவரி 1-ம் தேதி முதல் சாலைகளில் மாடுகள் திரிந்தால் அவை பறிமுதல் செய்யப்பட்டு சங்கரன்கோவிலில் உள்ள கோசாலைக்கு அனுப்பி வைக்கப்படும் என்று தெரிவித்தார். அவ்வாறு பறிமுதல் செய்யப்படும் மாடுகள் மீண்டும் உரிமையாளர்களிடம் ஒப்படைக்கப்பட மாட்டாது என அவர் எச்சரித்தார். அதேபோல், சாலைகளில் இடையூறாக வைக்கப்படும் டிஜிட்டல் போர்டுகளை முழுமையாகத் தடை செய்வது அல்லது குறிப்பிட்ட இடங்களை மட்டும் ஒதுக்குவது குறித்து ஆணையருடன் ஆலோசனை நடத்தி வருவதாகக் குறிப்பிட்டார்.
பொங்கல் திருவிழா மற்றும் பூங்கா பராமரிப்பு: பொங்கல் பண்டிகையை முன்னிட்டு பொதுமக்கள் பொழுதுபோக்குவதற்காக முத்துநகர் கடற்கரை பூங்கா, ரோச் பூங்கா, ராஜாஜி பூங்கா உள்ளிட்ட அனைத்துப் பூங்காக்களையும் சீரமைக்கும் பணிகள் நடைபெற்று வருகின்றன. முத்துநகர் கடற்கரையில் தனியார் ஒப்பந்தம் மூலம் விரைவில் படகு சவாரி தொடங்கப்பட உள்ளது. மேலும், 147 ஆண்டுகள் பழமை வாய்ந்த தெப்பக்குளம் பழமை மாறாமல் சீரமைக்கப்பட்டு வருகிறது. பிப்ரவரி 1-ம் தேதி நடைபெறவுள்ள தெப்பத் திருவிழாவிற்குள் பணிகளை முடிக்கத் திட்டமிடப்பட்டுள்ளது.
கட்டமைப்பு மற்றும் சுகாதாரப் பணிகள்: மாநகரில் புதிதாக 1,880 மின்கம்ப விளக்குகள் பொருத்தப்பட உள்ளன. ஏற்கனவே 3,000 புதிய சாலைகள் அமைக்கப்பட்டுள்ள நிலையில், விடுபட்ட பகுதிகளிலும் பாதாளச் சாக்கடை பணிகள் முடிந்தவுடன் புதிய சாலைகள் அமைக்கப்படும். தற்போது அமைக்கப்படும் அனைத்துக் கழிவுநீர் கால்வாய்களும் சுகாதாரத்தைப் பேணும் வகையில் மூடிகளுடன் அமைக்கப்பட்டு வருகின்றன.
இக்கூட்டத்தில் சொத்து வரி பெயர் மாற்றக் கட்டணம் தொடர்பான அரசாணை சமர்ப்பிக்கப்பட்டதுடன், 22 வளர்ச்சித் திட்ட தீர்மானங்கள் நிறைவேற்றப்பட்டன. முடிவில், “206 பூங்காக்கள் கொண்ட பசுமை மாநகராட்சியாக தூத்துக்குடி உருவெடுக்கும்” என்று குறிப்பிட்ட மேயர், அனைவருக்கும் புத்தாண்டு வாழ்த்துகளைத் தெரிவித்துக் கூட்டத்தை நிறைவு செய்தார்.
கூட்டத்தில் இணை ஆணையா் சரவணக்குமாா், மாநகராட்சி பொறியாளர் தமிழ்ச்செல்வன், உதவி பொறியாளர் சரவணன், நகரமைப்பு திட்ட செயற்பொறியாளர் வேலாயுதம், உதவி செயற்பொறியாளர் காந்திமதி, உதவி ஆணையர் வெங்கட்ராமன், சுகாதார ஆய்வாளர் ஸ்டாலின் பாக்கியநாதன், ராஜசேகா், மண்டல தலைவர்கள் வக்கீல் பாலகுருசுவாமி, கலைச்செல்வி, அன்னலெட்சுமி, மாமன்ற உறுப்பினர்கள் கீதாமுருகேசன், அதிஷ்டமணி, சரவணக்குமார், ரெங்கசாமி, பொன்னப்பன், ஜான்சிராணி, சந்திரபோஸ், முத்துவேல், மும்தாஜ், ராமுஅம்மாள், தனலெட்சுமி, முத்துமாரி, விஜயகுமாா், கனகராஜ், ஜாக்குலின்ஜெயா, ஆறுமுகம் வைதேகி, மெட்டில்டா, சுப்புலட்சுமி, பாப்பாத்தி, ரெக்ஸ்லின், வக்கீல் வீரபாகு உள்பட மாநகராட்சி அலுவலர்கள், மாமன்ற உறுப்பினர் பலர் கலந்து கொண்டனர்.