தூத்துக்குடியில் ரூ.30,000 கோடி முதலீட்டில் அமையவுள்ள இரண்டு புதிய கப்பல் கட்டும் தளங்கள் குறித்து தமிழக தொழில்துறை அமைச்சர் டி.ஆர்.பி. ராஜா முக்கிய அறிவிப்புகளை வெளியிட்டுள்ளார்.
கொச்சின் ஷிப்யார்டு லிமிடெட் (CSL) மற்றும் மசகான் டாக் ஷிப் பில்டர்ஸ் ஆகிய இரு நிறுவனங்களுடனும் தலா ரூ.15,000 கோடிக்கு ஒப்பந்தம் கையெழுத்தாகியுள்ளது. இந்த முதலீடுகள், தமிழகத்தின் தொழில்துறை வளர்ச்சிக்கு ஒரு புதிய உத்வேகத்தை அளிப்பதுடன், கப்பல் கட்டும் துறையில் இந்தியாவின் முக்கிய மையமாக தூத்துக்குடியை நிலைநிறுத்தும் என்று எதிர்பார்க்கப்படுகிறது.
இந்த இரண்டு திட்டங்கள் மூலம் மொத்தம் 55,000 பேருக்கு வேலைவாய்ப்பு உருவாகும் என்று அமைச்சர் தெரிவித்துள்ளார். கொச்சின் ஷிப்யார்டில் 4,000 பேருக்கு நேரடி வேலைவாய்ப்பும், 6,000 பேருக்கு மறைமுக வேலைவாய்ப்பும் கிடைக்கும். அதேபோல், மசகான் டாக் நிறுவனத்தில் 5,000 பேருக்கு நேரடி வேலைவாய்ப்பும், 40,000 பேருக்கு மறைமுக வேலைவாய்ப்பும் கிடைக்கும். இந்த வேலைவாய்ப்புகள் உள்ளூர் இளைஞர்களுக்கு ஒரு பெரிய வாய்ப்பை உருவாக்குவதுடன், தூத்துக்குடியின் பொருளாதார வளர்ச்சிக்கும் பெரிதும் உதவும்.
தமிழ்நாட்டின் தொழில்துறை வளர்ச்சி குறித்துப் பேசிய அமைச்சர், மின்னணு, வாகன உதிரிபாகங்கள், காலணி உற்பத்தி போன்ற துறைகளில் மாநிலம் முதலிடத்தில் உள்ளது என்று பெருமிதம் தெரிவித்தார். மேலும், முதலீட்டு ஒப்பந்தங்களை எளிமைப்படுத்துவதன் மூலம், உலகளவில் தொழில் செய்வதற்கு ஏற்ற மாநிலமாகத் தமிழ்நாடு மாறியுள்ளது என்றும் குறிப்பிட்டார்.
செய்தி மற்றும் விளம்பர தொடர்புக்கு:-
தூத்துக்குடி மக்கள் செய்திகள்:
97896-25946,0461-7960026.