அரசு பேருந்தில் ஏசி வேலை செய்யாததால்…பயணிக்கான நஷ்ட ஈட்டை அதிகாரிகள் சொந்தப் பணத்தில் வழங்க உத்தரவு!

அரசுப் பேருந்தில் ஏசி வேலை செய்யாததால் ஏற்பட்ட சிரமத்திற்கு, நெல்லை நுகர்வோர் குறைதீர் ஆணையம் அதிரடி தீர்ப்பு வழங்கியுள்ளது. பாதிக்கப்பட்ட பயணிக்கு அதிகாரிகள் தங்கள் சொந்தப் பணத்திலிருந்து நஷ்ட ஈடு வழங்க வேண்டும் என உத்தரவிடப்பட்டுள்ளது.
கடந்த ஆண்டு ஏப்ரல் 1-ஆம் தேதி, ராஜேஷ் என்பவர் மதுரை-நெல்லை அரசுப் பேருந்தில் ரூ.190 கட்டணம் செலுத்திப் பயணம் செய்துள்ளார். ஆனால், பேருந்தில் ஏசி வேலை செய்யாததால் சக பயணிகளைப் போலவே இவரும் பெரும் அவதிக்குள்ளாகியுள்ளார். இதுகுறித்து போக்குவரத்துக் கழக அதிகாரிகளிடம் புகார் அளித்தும் எந்த நடவடிக்கையும் எடுக்கப்படாததால், ராஜேஷ் நெல்லை மாவட்ட நுகர்வோர் குறைதீர் ஆணையத்தில் வழக்குத் தொடர்ந்தார்.
வழக்கை விசாரித்த நுகர்வோர் குறைதீர் ஆணையம், ராஜேஷுக்கு நஷ்ட ஈடாக ரூ.25,000 மற்றும் வழக்குச் செலவாக ரூ.10,000 என மொத்தம் ரூ.35,000-ஐ ஒரு மாதத்திற்குள் வழங்க வேண்டும் என்று உத்தரவிட்டுள்ளது. மேலும், இந்தத் தொகையை நெல்லை மண்டல போக்குவரத்துக் கழகப் பொது மேலாளர் மற்றும் நிர்வாக இயக்குனர் ஆகியோர் தங்கள் சொந்தப் பணத்திலிருந்து செலுத்த வேண்டும் என்றும் ஆணையம் திட்டவட்டமாகத் தெரிவித்துள்ளது.
இந்தத் தீர்ப்பு, பொதுப் போக்குவரத்து சேவைகளில் ஏற்படும் குறைபாடுகளுக்கு அதிகாரிகள் பொறுப்பேற்க வேண்டும் என்பதை வலியுறுத்தும் விதமாக அமைந்தது.

உள்ளூர் தகவல்கள் மற்றும் செய்திகளை உடனுக்குடன் தெரிந்துகொள்ள,

தூத்துக்குடி மக்கள் செய்திகள் WhatsApp சேனலுடன் எப்போதும் இணைந்திருங்கள்!
சேனலில் இணைய, இந்த இணைப்பைக் கிளிக் செய்யவும்: https://whatsapp.com/channel/0029Va6ahuJ2UPBOuJiyLl46