தூத்துக்குடி சிவன் கோவிலில் நாளை தைப்பூசத் திருவிழா!

தூத்துக்குடியில் பிரசித்தி பெற்ற ஸ்ரீ பாகம்பிரியாள் உடனுறை சங்கர ராமேசுவரர் திருக்கோவிலில் (சிவன் கோவில்), ஆண்டுதோறும் சிறப்பாகக் கொண்டாடப்படும் தைப்பூசத் திருவிழா நாளை வெகு விமரிசையாக நடைபெற உள்ளது.

இவ்விழாவையொட்டி நாளை காலை 8.30 மணிக்கு ஸ்ரீ சோமாஸ்கந்தர், சுந்தரபாண்டிய விநாயகர் கோவிலுக்கு எழுந்தருளும் நிகழ்வு நடைபெறுகிறது. அதனைத் தொடர்ந்து காலை 9.00 மணிக்கு கும்ப பூஜையும், 10.00 மணிக்கு சுவாமி மற்றும் அம்பாளுக்குச் சிறப்பு அபிஷேகங்களும் நடைபெறும். திருவிழாவின் முக்கிய நிகழ்வான தீர்த்தவாரி காலை 11.00 மணி அளவில் நடைபெற உள்ளது.
நண்பகல் 12.00 மணிக்கு உச்சிக்கால தீபாராதனைக்குப் பிறகு, இரவு 7.00 மணி அளவில் சுவாமி, அம்பாள் மற்றும் சுந்தரபாண்டிய விநாயகருக்குச் சோடச தீபாராதனை காட்சியும் நடைபெறும். இதற்கிடையில், கோவில் தெப்பக்குளத்தின் சுவர் சேதமடைந்துள்ளதைக் கருத்தில் கொண்டு, பக்தர்களின் பாதுகாப்பு நலன் கருதி இந்த ஆண்டு மட்டும் தெப்ப உற்சவம் நடைபெறாது என கோவில் நிர்வாகம் சார்பில் அதிகாரப்பூர்வமாக அறிவிக்கப்பட்டுள்ளது. இருப்பினும், மற்ற அனைத்து வழிபாட்டுச் சடங்குகளும் வழக்கமான உற்சாகத்துடன் நடைபெறும் என்பதால், நாளை திரளான பக்தர்கள் கோவிலுக்கு வருகை தருவார்கள் என எதிர்பார்க்கப்படுகிறது.