வீரவநல்லூரில் மாணவர் தற்கொலை; தனியார் பள்ளி வாகனங்கள் மீது பெட்ரோல் குண்டு வீச்சு – பெரும் பதற்றம்!

திருநெல்வேலி மாவட்டம் வீரவநல்லூரில் தனியார் பள்ளி மாணவர் விஷமருந்தி தற்கொலை செய்துகொண்ட சம்பவத்தையடுத்து, பள்ளி வாகனங்கள் மீது பெட்ரோல் குண்டுகள் வீசப்பட்டதால் அப்பகுதியில் பெரும் பரபரப்பும் பதற்றமும் நிலவுகிறது.

மாணவர் தற்கொலை: நடந்தது என்ன?

வீரவநல்லூர் அருகேயுள்ள மானாபரநல்லூர் வடக்குத் தெருவைச் சேர்ந்த விவசாயி சங்கரகுமாரின் மகன் சபரி கண்ணன் (15). இவர் வீரவநல்லூரில் உள்ள ஒரு தனியார் பள்ளியில் 10-ஆம் வகுப்பு படித்து வந்தார். அண்மையில் பள்ளியில் நடைபெற்ற ஒரு நிகழ்ச்சியில் சபரி கண்ணன் ஒழுங்கீனமாக நடந்து கொண்டதாகவும், அதற்காக ஆசிரியர்கள் அவரைக் கண்டித்ததாகவும் கூறப்படுகிறது.

இந்த நிலையில், கடந்த ஜூலை 7-ஆம் தேதி சபரி கண்ணன் விஷமருந்தி பள்ளிக்கு வந்துள்ளார். பள்ளி வளாகத்திலேயே மயங்கி விழுந்த அவரை உடனடியாக மீட்டு, சேரன்மகாதேவி அரசு மருத்துவமனையில் சேர்த்தனர். அங்கு முதலுதவி அளிக்கப்பட்டு, பின்னர் மதுரைக்கு ஒரு தனியார் மருத்துவமனைக்கு மேல் சிகிச்சைக்காகக் கொண்டு செல்லப்பட்டார். ஆனால், சிகிச்சை பலனின்றி சபரி கண்ணன் நேற்று முன்தினம் (ஜூலை 17, 2025) பரிதாபமாக உயிரிழந்தார்.

போராட்டம் மற்றும் பதற்றம்

சபரி கண்ணனின் மரணத்தால் அதிர்ச்சியடைந்த அவரது உறவினர்கள் சுமார் 100-க்கும் மேற்பட்டோர் நேற்று முன்தினம் இரவில் வீரவநல்லூர் காவல் நிலையம் முன்பு திரண்டனர். தனியார் பள்ளி நிர்வாகத்தைக் கண்டித்து சாலை மறியல் போராட்டத்தில் ஈடுபட்டதால் அப்பகுதியில் போக்குவரத்து பாதிக்கப்பட்டது. காவல்துறையினர் அவர்களுடன் பேச்சுவார்த்தை நடத்திய பின்னர் மறியல் கைவிடப்பட்டது. இந்த மறியலில் ஈடுபட்ட 50 பேர் மீது வழக்குப்பதிவு செய்யப்பட்டுள்ளது.

பெட்ரோல் குண்டு வீச்சு;-

இதற்கிடையே, நேற்று முன்தினம் நள்ளிரவில் அடையாளம் தெரியாத மர்ம நபர்கள், சம்பந்தப்பட்ட தனியார் பள்ளி வளாகத்தில் நிறுத்தப்பட்டிருந்த இரண்டு பேருந்துகள் மீது பெட்ரோல் குண்டுகளை வீசியுள்ளனர். இதனால் பேருந்துகள் தீப்பற்றி எரிந்தன. தகவலறிந்து சம்பவ இடத்திற்கு வந்த தீயணைப்பு படையினர் விரைந்து செயல்பட்டு தீயை அணைத்தனர். இந்த சம்பவத்தை அடுத்து, அப்பகுதியில் காவல்துறையினர் அதிக அளவில் குவிக்கப்பட்டுள்ளனர். நேற்று (ஜூலை 18, 2025) பள்ளிக்கு விடுமுறை அறிவிக்கப்பட்டது. பள்ளி வாகனங்கள் மீது பெட்ரோல் குண்டு வீசிய மர்ம நபர்களை காவல்துறையினர் தீவிரமாகத் தேடி வருகின்றனர்.இந்த தொடர்ச்சியான சம்பவங்கள் வீரவநல்லூரில் பெரும் பதற்றத்தை ஏற்படுத்தியுள்ளன. காவல்துறையினர் நிலைமையைக் கண்காணித்து வருகின்றனர்.